Dagur 2 Siem Riep frh.

Það var fagnaðarfundur í fallega sundlaugagarðinum, skreyttur Búddastyttum og fögrum gróðri.  Það voru ekki allir laugargestir jafn ánægðir með hvað það er gaman hjá okkur, frönsk frekja sem að lá dottandi á bekk í borubuxum einum fata, hvæsti á okkur og bað okkur um að þegja.  Við létum það nú ekki á okkur fá, bentum henni á nokkrar góðar bækur til aflestrar til þess að öðlast innri ró og yfirvegun og héldum okkar striki.  Snótin hefndi sín með því að púa yfir okkur sígarettureyk og snyrta sína leyndustu líkamsparta vopnuð plokkara.  Aldrei þessu vant varð "the mutual admiration society" orðlaust.  En það stóð nú ekki lengi yfir.  Okkur var boðið til kvöldverðar með farþegunum á glæsilegasta hóteli borgarinnar, þannig að það var kominn tími til að klæða sig upp í okkar fínasta púss.  Við hittumst úti í garði til þess að taka upp kveðju til árshátiðargesta Icelandair, því miður brást tæknin okkur en við hugsuðum til ykkar.  Það var tilkomumikil aðkoma í hótelgarðinn stígurinn að borðhaldinu kyndlum skreyttur, búið að spreyja grasið með flugnaeitri, til þess að gestir gætu snætt utandyra án þess að verða fyrir áras moskítóflugna. Ekki var þó hægt að gera neitt í ofvöxnum leðurblökum á stærð við ketti sem að sveimuðu yfir prúðbúnum gestunum, nokkrir fengu að finna illþyrmilega fyrir líkamsvessum þeirra sem að lentu í hári þeirra eða drykkjum.  Við vorum þó laus við þær þegar að við settumst til borðs.  Maturinn var mjög góður og gaman að blanda geði við farþegana okkar, þeir eru alsælir með okkur og eru með samsæri um að hleypa okkur ekki út í Keflavík.  Eftir matinn buðu A&K farastjórarnir okkur upp á drykk á  elsta og virtasta bar Siem Riep "the Elephant bar". 

Athugasemdir

[Ásdís Jónsdóttir (IP-tala skráð) 31.1.2008 kl. 13:41]

Kæra Áhöfn,

Mikið er gaman að fylgjast með ykkur. Hér er allt gott ég sakna ykkar elsku vinkomur og Péturs líka. Það var mjög gaman á árshátíðinni . Ein í læstri hliðarlegu og allt. Er farin að hlakka til að fá ykkur heim . Knús til allra .

Ásdís